Келер жылдан бастап Ресей газының Қазақстан арқылы Қырғызстанға транзиті артады, деп хабарлайды Juzmedia.kz LS басылымына сілтеме жасап.
"QazaqGaz" ұлттық компаниясының басқарма төрағасы Әлібек Жамауовтың айтуынша, өткен жылы Қазақстан аумағы арқылы Өзбекстанға 5,6 млрд текше метр ресейлік газ тасымалданған. Биыл бұл көлемді 6 млрд текше метрге дейін жеткізу жоспарланып отыр. Ал 2026 жылдан бастап Ресей газының Қырғызстанға жеткізілімі 600 млн текше метрден асады.
Сонымен қатар, Түрікменстан мен Өзбекстаннан Қытайға жөнелтілетін газ транзиті 35,5 млрд текше метрге дейін ұлғаяды.
Жамауовтың мәліметінше, биылғы тоғыз айдың қорытындысы бойынша компания 3,9 млрд текше метр газ экспорттаған. Бұл жоспардан 28%-ға жоғары көрсеткіш. Ал ішкі нарыққа жеткізу көлемі толық орындалып, 13,6 млрд текше метрді құраған.
Ол сондай-ақ Қашаған кен орнында салынып жатқан газ өңдеу зауытының аяқталу мерзіміне тоқталды.
"Жылына 1 млрд текше метр газ өндіретін бұл жоба стратегиялық тұрғыдан маңызды. Қондырғыларды жеткізу 2026 жылдың шілдесіне дейін аяқталып, құрылыс-монтаж жұмыстары қазан айында басталады. Зауыт толықтай 2026 жылдың желтоқсан айында пайдалануға беріледі", – деді басқарма төрағасы.
Оның айтуынша, қазіргі уақытта Қазақстан өзін газбен толық қамтамасыз етіп отыр, бірақ қыс мезгілінде аздаған импорт қажет болады. Осыған байланысты шетелдік инвесторлармен жаңа жобалар бойынша келіссөздер жүргізіліп жатыр.
Биыл республикалық бюджет есебінен газдандырудың 45 жобасына 65,9 млрд теңге бөлінген, оның ішінде 31 нысан 2025 жылы пайдалануға беріледі. Бұған қоса, "Самұрық-Қазына" қоры 55 жобаны іске асыру үшін 46,5 млрд теңге бағыттаған.
Нәтижесінде, 2025 жылы аяқталатын жобалар арқылы 29 елді мекендегі 292,7 мың адам газға қосылады деп жоспарлануда. Газдандыру деңгейі 63,8%-ға жетіп, 1,4%-ға өседі.
Жамауовтың айтуынша, көтерме бағаның кезең-кезеңімен көтерілуіне қарамастан, Қазақстанда халық үшін газ тарифтері әлі де ең төмен деңгейде қалып отыр.
"Газ жеткізудің тұрақтылығын сақтау және инфрақұрылымды дамыту үшін көтерме бағаны өзіндік құн деңгейіне дейін жеткізу қажет. Соңғы 33%-дық түзетуден кейін де ішкі нарықта жыл сайын шамамен 200 млрд теңге субсидия бөлінеді", – деді ол.
QazaqGaz-дың жиынтық шығындары соңғы 10 жылда $2,8 млрд-қа жеткен.
