Түркияның батысындағы Балыкесир облысында 6,1 магнитудалы жер сілкінісі тіркелді. Ғимараттардың бүлінуі жайлы хабарланғанымен, қаза тапқандар жоқ деп хабарлайды Juzmedia.kz.
27 қазанда жергілікті уақытпен 22:48-де Балыкесир облысының Сындыргы ауданында 6,1 магнитудалы жер сілкінісі болды. Дүмпудің тереңдігі шамамен 5,9 шақырым болған. Түркияның төтенше жағдайлар агенттігі хабарлағандай, алғашқы дүмпуден кейін магнитудасы 3,5–4,2 аралығында бірнеше афтершок тіркелді.
Жер сілкінісінен төрт ғимарат толық немесе ішінара қирады, бірақ адам өлімі тіркелмеді. Аймақтың кей бөліктерінде электр желілері мен жол инфрақұрылымына зақым келген. Құтқару қызметтері мен азаматтық қорғаныс бөлімдері тұрғындарды эвакуациялап, қауіпсіз аймақтарға көшіріп жатыр.
Мамандар жер сілкінісінің тереңдігі аз болғандықтан дүмпу айтарлықтай қатты сезілгенін айтады. Бұл оқиға Түркияның батысындағы сейсмикалық белсенділіктің әлі де жоғары екенін көрсетеді. Сарапшылар алдағы күндері жаңа афтершоктардың болуы мүмкін екенін ескертті.
