Ақтөбеде «Газель» мен DAF жүк көлігі соқтығысып, 12 адам қаза тапқан апат туралы жаңа деректер жарияланды деп хабарлайды Juzmedia.kz.
Оқиға Белқопа ауылы маңында болған. Тағы алты адам ауруханаға жеткізілді. Қаза тапқандардың арасында үш жастағы бала мен оның ата-анасы бар.
Қаза тапқандардың арасында бір отбасының мүшелері бар: әке мен оның үш жастағы ұлы. Сондай-ақ апат салдарынан анасы мен 18 жастағы студент баласы көз жұмған.
«Қайтыс болғандардың ең кішісі небәрі үш жаста болған, ал ең үлкені – 72-де. Төрт науқасқа реанимация бөлімінде қарсы шок терапиясы жасалып жатыр. Облыс орталығынан екі дәрігер бригадасы — балалар және ересектер тобы келіп, құрамында реаниматологтар, травматологтар, хирургтар мен нейрохирургтар бар. Пациенттердің жағдайы мен өмірлік көрсеткіштеріне сәйкес операциялар жасалды», — деп хабарлады дәрігерлер.
Белгілі болғандай, «Газель» Жүргенов ауылы – Ақтөбе бағытымен жолаушылар тасымалдаған. Көлік жеке кәсіпкерге тиесілі және ресми келісімшарт негізінде жұмыс істепті. Салонда 16 адам болған, барлығы жолға қалаға бару мақсатымен шыққан.
Аймақ басшысы Асхат Шахаров оқиға орнына барып, марқұмдардың туыстарына көңіл айтты.
«Бұл орны толмас қайғы. Қаза тапқандардың отбасыларына миллион теңгеден өтемақы беріледі. Барлық зардап шеккендерге қажетті медициналық көмек көрсетілуде. Жағдай менің жеке бақылауымда», – деді облыс әкімі.
Қазір апат орнында құтқарушылар, дәрігерлер және полиция жұмыс істеп жатыр. Оқиғаға байланысты жедел штаб құрылып, төтенше жағдайлар қызметінің психологиялық көмек көрсету желісі іске қосылды: 8 (7132) 54-86-82. Хромтау мен Қарабұтақ арасындағы жол жеңіл көліктер үшін ашық, ал жүк көліктердің қозғалысы уақытша шектелген.
