Қазақстанда сыртқы (оның ішінде көшелерде, жол жиегінде орналастырылатын) жарнама саласын жүйелі түрде ретке келтіру басталды, деп хабарлайды Juzmedia.kz.
Мемлекеттік органдар жарнама қандай мазмұнда және қай жерде орналастырылатынына бұрынғыдан да қатаң қарауға көшті. Әсіресе жол бойындағы және тротуарлардағы жарнама объектілері көлік жүргізушілердің назарының бөлінуіне әкелуі мүмкін деген қауіппен қаралып жатыр. Сонымен қатар, елде аудиожарнамаға жол бермеу, букмекерлік және тотализатор қызметтері жөніндегі жарнамаға қатысты заңнамалық талаптар күшейтілген.
2025 жылғы қаңтар–қыркүйек аралығында жарнама саласындағы әкімшілік құқық бұзушылықтар саны күрт артты: жарнама туралы заң бұзғандар саны былтырғы мерзіммен салыстырғанда шамамен 16 есе өсті. Әкімшілік айыппұлдар сомасы да бірден 30 есе көбейіп, 35,1 млн теңгеге жетті.
Жарнама нарығында сыртқы жарнаманың үлесі де өсті: 2025 жылдың бірінші жартыжылдығында бұл сектор 12,5 млрд теңге көлемге жетіп, жалпы қызметтер нарығында 20,8%-ды құрады. Сарапшылар бұл өсімді цифрлық сыртқы жарнама (Digital Out of Home) секторының дамуымен байланыстырады.
Жалпы алғанда, маркетингтік тұрғыда сыртқы жарнама тартымдылығын арттырғанмен, енді оның заң мен тәртіп шеңберінде жүзеге асуына айқын талаптар қойылуда.
