АҚШ Қаржы министрлігі Мәскеудің стратегиялық ядролық күштерін қамтыған оқу-жаттығуларынан кейін Ресейдің бірқатар мұнай және энергетикалық кәсіпорындарына қарсы жаңа санкциялар пакетін жариялады. Бұл шешім Украинадағы соғыс жағдайында Мәскеуге қаржылық қысымды күшейтуді көздейді, деп хабарлайды Juzmedia.kz.
Вашингтон санкциялардың себебін Ресейдің “қауіп төндіретін әскери демонстрацияларымен” байланыстырды. Ядролық жаттығулар кезінде Ресей стратегиялық бомбалаушы ұшақтар мен зымыран жүйелерін сынады. АҚШ әкімшілігі мұны “жаһандық тұрақтылыққа нұқсан келтіретін әрекет” деп бағалап, энергетика секторын нысанаға алды. Шектеулер ресейлік компаниялардың халықаралық есеп айырысуы мен долларлық операцияларын шектейді, сондай-ақ шетелдік серіктестермен мәмілелерге тосқауыл қоюы мүмкін.
Сарапшылардың бағалауынша, санкциялардың әсері Ресей экономикасына бірден сезілмесе де, ұзақ мерзімде экспорт кірісін төмендетіп, соғыс қаржыландыру мүмкіндігін тарылтады. Ал мұнай нарығында белгісіздік артып, баға құбылмалылығының күшеюі ықтимал. Мәскеу өз кезегінде бұл шараны “саяси қысымның жалғасы” деп атап, қарсы жауап дайындайтынын мәлімдеді.
