Елімізде азаматтарды қоныс аударуға ынталандыру және көші-қон үдерісін басқару тәсілі түбегейлі жаңартылады. Жаңа жүйенің алғашқы кезеңі Алматы мен оған іргелес елді мекендерде енгізіледі, деп хабарлайды Juzmedia.kz.
Еңбек және халықты әлеуметтік қорғау министрлігінің мәліметінше, қазір ведомство мүдделі мемлекеттік органдармен бірлесіп, көші-қон процестерін басқарудың бірыңғай цифрлық жүйесін кезең-кезеңімен енгізіп жатыр. Сонымен қатар 2030 жылға дейінгі көші-қон тұжырымдамасы әзірленуде. Құжат аясында жаңа қағидат енгізіледі — «алдымен инфрақұрылым, содан кейін көшу». Сондай-ақ бейімдеу мен интеграция қызметтерін жетілдіру, көшуге ынталандыру шаралары қарастырылды.
Көші-қонды реттеу мәселесінде ірі қалаларға ерекше назар аударылмақ. Алматы және Алматылық агломерация үшін арнайы жұмыс тобы құрылып, өңірдің теңгерімді дамуын ескеретін ұсыныстар әзірлеуде. Осы бағытта агломерацияның аумақтық дамуын қамтамасыз етуге, ведомстволар арасындағы өзара іс-қимыл тетіктерін жетілдіруге және халықты тіркеудің цифрлық инфрақұрылымын жақсартуға бағытталған жол картасы қабылданды.
Жаңа тәсіл ауылдық жерлердің экономикалық белсенділігін арттыруды және көші-қонды қалалық ортаға біртіндеп бейімдеуді көздейді. Сондай-ақ көшу процесіне бақылауды күшейтіп, адами капиталды тиімді бөлу тетіктері енгізіледі. Негізгі мақсат — ел ішіндегі демографиялық теңсіздіктерді азайту.
Алматыдағы жобаның нәтижесіне қарай дәл осындай бағдарламалық құжат кейін Нұр-Сұлтан мен Шымкент қалалары үшін де әзірленбек.
