АҚШ пен Қытай арасындағы сауда шиеленісінің бәсеңдеуі туралы үміт мұнай мен қор нарығына серпін берді. Дональд Трамп тарифтерді арттыру жөніндегі мәлімдемесінен кейін «сауда қатынастары дұрыс жолға түседі» деп жұмсарды, деп хабарлайды Juzmedia.kz.
Доллар индексі 99,2 деңгейінен жоғары сақталып тұр. Инвесторлар АҚШ банктерінің қаржылық есептерін күтіп отыр, себебі олар экономикадағы нақты үрдістерді айқындайды. Доллар йенге қатысты нығайды, ал Жапонияда саяси белгісіздік күшейіп келеді.
Мұнай нарығында да оң қозғалыс байқалды. Brent маркалы мұнайдың баррелі 63,50 долларға дейін көтерілді. Баға 61,50–65,00 доллар аралығында тұрақтап тұр. Сауда келіссөздерінің қайта жандануы туралы үміт мұнай нарығына қолдау көрсетіп отыр. Сонымен қатар, Трамп пен Си Цзиньпиннің ай соңында кездесуі жоспарланып отыр.
АҚШ қор нарығы да оң бағытқа бет алды. S&P 500, Nasdaq және Dow Jones индекстері өсім көрсетті. Технологиялық компаниялар мен жасыл энергетика саласындағы акциялар қымбаттады. Криптовалюта нарығы керісінше төмендеді: биткоин 113 800 доллар шамасына түсті, жалпы нарықтық капитализация 3,9 триллион долларға тең болды.
Инвесторлар қазір негізгі назарды ірі америкалық банктердің табыс есебіне аударып отыр — ол алдағы экономикалық бағытты айқындамақ.
