Қостанай облысында бес күн бұрын жоғалып кеткен тұрғын іздестіріліп жатыр

Қостанай облысында із-түзсіз жоғалған жергілікті тұрғын бес күннен бері іздестіріліп жатыр, деп хабарлайды Juzmedia.kz.

Облыстық төтенше жағдайлар департаментінен хабарлағандай, ер адам 5 қарашада үйінен шығып кеткен.

«Қарабалық ауданы Славянка ауылынан 5 шақырым жердегі шаруа қожалықтарының бірінде 1987 жылы туылған ер адам мал іздеп шығып, сол күйі хабарласпай кеткен», - делінген ТЖД хабарламасында.

Іздеу жұмыстарына құтқарушылар, полиция қызметкерлері, жергілікті атқарушы органдар, шекарашылар, еріктілер, кинологтар мен ұшқышсыз ұшу аппараты жұмылдырылған.

Қостанай облысының Төтенше жағдайлар департаменті тұрғындарға әсіресе күзгі-қысқы ауа райының құбылмалы жағдайында қауіпсіздік шараларын сақтаудың маңыздылығын ескертеді.

Бірнеше негізгі ұсыныстар:

1. Жолыңызды жоспарлаңыз және жақын адамдарыңызға ескертіңіз.
2. Ауа райына сай киініп, өзіңізбен бірге қосалқы заттарды алыңыз.
3. Байланыс және навигация құралдарын алуды ұмытпаңыз.
4. Өзіңізбен бірге тамақ пен судың ең аз мөлшерін алыңыз.
5. Таныс емес жерлерде абай болыңыз.