Украина президенті Владимир Зеленский дүйсенбі күні Еуропа елдерінің басшыларымен бірге Вашингтонға барып, АҚШ президенті Дональд Трамппен бейбіт келісім мәселесін талқыламақ, деп хабарлайды Juzmedia.kz Reuters-ке сілтеме жасап.
Кездесуге Британия, Германия, Франция, Италия, Финляндия және НАТО басшылары қатысады. Олар Зеленскийді қолдап, Мәскеуге тиімді болуы ықтимал келісімге жол бермеуді көздеп отыр.
Ақ үйдің ресми мәліметіне сай, Трамп алдымен Зеленскиймен жеке кездеседі, кейін Еуропа басшыларымен бірге Ақ үйдің Сопақ залында келіссөз өткізеді.
Осыған дейін Трамп Аляскада Ресей президенті Владимир Путинмен жолығып, «соғысты тоқтатудың уақыты келді» деп мәлімдеген. Ол «Ресей – үлкен держава, ал Украина ондай емес» деген сөздерімен Киевте алаңдаушылық туғызды.
Алайда Зеленский Мәскеудің Донбастың қалған бөлігін беруді көздейтін ұсынысын қабылдамайтынын ашық айтты.
«Біз нақты келіссөзге дайынбыз. Бірақ олар майдан шебінен басталуы тиіс. Конституция бойынша жерді беруге болмайды», – деді ол Брюссельде.
Зеленский Вашингтонға жеткен соң Telegram-да:
«АҚШ президентінің шақырғанына ризамын. Біз барлығымыз соғысты әділ әрі сенімді тоқтатуды қалаймыз. Бұл соғысты бастаған – Ресей, оны да тоқтатуы тиіс. Біз Америка мен Еуропа достарымыздың қолдауымен Ресейді шынайы бейбітшілікке мәжбүр ете аламыз», – деп жазды.
Сарапшылардың айтуынша, Еуропа лидерлерінің қатысуы Зеленскийдің қолын күшейтпек. Өйткені ақпан айында Трамппен өткен жеке кездесу өте салқын жағдайда өткен еді.
