WhatsApp Ресей билігін елдегі 100 миллионнан астам адамды қауіпсіз байланыстан айыруға тырысып отыр деп мәлімдеді. Бұл мәлімдеме қосымшада қоңырау шалу мүмкіндігі шектелгеннен кейін жасалды деп хабарлайды Juzmedia.kz.
Ресей билігі WhatsApp пен Telegram қоңырауларын шектеуді бастады, мұны алаяқтық және терроризм істерінде құқық қорғау органдарына деректер бермегенімен түсіндірді. Хабар алмасу мен дауыс жазу функциялары әзірге жұмыс істеп тұр.
Meta Platforms-қа тиесілі WhatsApp «жеке, шифрланған байланысқа» Ресейдің кедергі келтіруін сынға алды.
«Біз шифрланған байланысты бүкіл әлемдегі адамдарға, соның ішінде Ресейде де, қолжетімді ету үшін қолдан келгеннің бәрін жасаймыз», — делінген компания мәлімдемесінде.
Telegram өз кезегінде жасанды интеллект көмегімен күн сайын зиянды хабарламалардың миллиондағанын өшіріп отырғанын айтты.
Mediascope дерегінше, 2025 жылдың шілдесінде Ресейде WhatsApp ай сайын 97,3 миллион адамға, Telegram — 90,8 миллион, ал мемлекеттік VK компаниясына тиесілі VK Messenger — 17,9 миллион адамға жеткен.
Human Rights Watch ұйымы Ресейдің интернетті қатаң бақылауға алып, оқшаулауға бағытталған заңдық және технологиялық тетіктерін кеңейтіп жатқанын хабарлады. Жаңа заң «экстремистік» деп танылған контентті іздегендерге, тіпті VPN арқылы да, айыппұл салуға мүмкіндік береді.
