Израиль әскері Газа қаласындағы әуе соққысы кезінде «Әл-Жазира» арнасының журналисі Анас аш-Шарифті ХАМАС жетекшісі ретінде өлтіргенін мәлімдеді. Бұл мәлімдемені арна мен құқық қорғаушылар жоққа шығарып отыр деп хабарлайды Juzmedia.kz Reuters-ке сілтеме жасап.
28 жастағы аш-Шариф Газа қаласындағы «Шифа» ауруханасы жанында тігілген шатырға жасалған соққыдан кейін қаза болды. Сол жерде тағы үш журналист пен арна көмекшісі мерт болды, тағы екі адам қаза тапқаны хабарланды.
Анас аш-Шариф — соңғы күндері Газа туралы нақты деректерді X желісінде тұрақты жариялап келген танымал репортёр. Өлімінен бірнеше минут бұрын Израильдің екі сағат бойы қаланы бомбалап жатқаны туралы жазба қалдырған.
Израиль әскері аш-Шарифті ХАМАС-тың ракеталық шабуылына жауапты адам деп сипаттап, бұл тұжырымды Газада табылған құжаттар мен барлау ақпаратына сүйеніп жасады. Алайда «Аль-Джазира» бұл мәлімдемені жоққа шығарып, «журналистерді террорист етіп көрсетуге бағытталған жалған дәлелдер» деп атады. Телеарна өкілдері шабуылды «Газаны оккупациялауға дайындық аясында шындықты жеткізетін дауыстарды өшіру әрекеті» деп бағалады.
БҰҰ-ның арнайы баяндамашысы Ирен Хан шілдеде Израильдің аш-Шарифке қатысты айыптаулары дәлелсіз екенін мәлімдеген. Журналистерді қорғау комитеті де дәл осы журналистің өміріне қауіп төніп тұрғанын ескертіп, халықаралық қауымдастықты араласуға шақырған. Израиль бұл айыптауларға нақты дәлелдер ұсынбады.
Аш-Шариф қайтыс бола қалған жағдайда жариялауға арналған жазбасында:
«Мен шындықты бұрмаламай, бүкпесіз жеткізуге ешқашан тайсалмадым. Үнсіз қалғандарға Құдай куә болсын» деп жазған.
Палестина билігі оның өлімін Израильдің жаңа әскери операциясының бастауы деп бағаласа, ХАМАС бұл шабуылдарды алдағы ауыр қылмыстарға жол ашу деп сипаттады.
Израиль премьері Биньямин Нетаньяху ХАМАС-тың тірек пункттерін жою үшін жаңа шабуыл бастайтынын мәлімдеді.
Соғыс басталғалы бері Газа секторында 237 журналист қаза тапты. Халықаралық есеп бойынша олардың кемінде 186-сы осы қақтығыс кезінде мерт болған.
«Анас аш-Шариф пен оның әріптестері — Газа шындығын бүкіл әлемге жеткізген соңғы дауыстардың бірі болды» делінген «Аль-Джазира» мәлімдемесінде.
