Еңбек және халықты әлеуметтік қорғау бірінші вице-министрі Асқарбек Ертаев Корея Республикасының елшісі Чжо Тэ-икпен кездесті. Тараптар қазақстандықтарды Оңтүстік Кореяда ресми жұмысқа жіберуге мүмкіндік беретін Employment Permit System (EPS) жүйесіне қосылудың алдағы қадамдарын талқылады деп хабарлайды Juzmedia.kz.
EPS — Кореядағы шетелдік жұмысшыларға рұқсат берудің бірыңғай мемлекеттік тетігі; оған қосылу қазақстандықтарға заңды, қауіпсіз және келісімшартпен еңбек етуге жол ашады.
Кездесуде қазақстандықтардың Кореяда тәртіпке келтірілген түрде жұмысқа орналасуын қамтамасыз етуге бағытталған ұлттық шаралар туралы ақпарат берілді.
Тараптар еңбек көші-қоны саласындағы ынтымақтастықты күшейтіп, практикалық келіссөздерді жалғастыруға уағдаласты.
