АҚШ армиясының отставкадағы подполковнигі Джеффри Фриц Ресейден Командор аралдарын 15 миллиард долларға сатып алуды ұсынды. Оның пікірінше, бұл қадам АҚШ-тың Арктика аймағындағы қауіпсіздігін нығайтып, Қытай суасты қайықтарының бағытын бақылауға мүмкіндік береді деп хабарлайды Juzmedia.kz Breaking Defense басылымына сілтеме жасап.
Фрицтің ұсынысы бойынша, егер Ресей аралдарды сату жөнінде келісімге келсе, олар Аляска құрамына енгізіліп, АҚШ-тың экономикалық аймағы шамамен 3,8 пайызға ұлғаймақ. Оның ойынша, бұл екі жаққа да тиімді мәміле болуы мүмкін. АҚШ Құрама Штаттарының соңғы жылдардағы геосаяси бәсекесінде Арктика бағытындағы белсенділігі артқанын ескерсек, бұл ұсыныстың астарында әскери-стратегиялық есеп жатқанын аңғаруға болады.
Ресей тарапы бұл ұсынысқа бірден қарсы шықты. Ресей Сыртқы істер министрлігінің өкілі Мария Захарова мұндай бастаманы «абсурд» деп атап, «ана жерді сату – кешірілмейтін қылмыс» екенін еске салды. Ал Мемлекеттік дума депутаты Сергей Миронов керісінше, Америкаға Алясканы қайтарып алу туралы ұсыныс жасады. Бұл жауаптың ресми ұсыныс емес, саяси емеурін ретінде жасалғаны анық.
Командор аралдары – Ресейдің Қиыр Шығысындағы стратегиялық маңызы бар аумақ. Олар бұрыннан АҚШ пен Ресей арасындағы геосаяси шекара іспетті. Аралдарды сату туралы ұсыныс әзірге ресми деңгейде талқыланып жатқан жоқ. Бірақ бұл оқиға әлемдік державалардың мұхит пен аймақтық үстемдікке қатысты мүддесі қай бағытта екенін көрсетті.
