Қазақстандықтар нан мен күрішті аз тұтынып, етті көбірек жей бастады

ҚАЙ ӨҢІРДЕ ЕТТІ КӨП ЖЕЙДІ

Статистика бюросының мәліметінше, осы жылдың II тоқсанында бір қазақстандық 19,7 кг-нан астам ет пен ет өнімдерін (+3,6%) жеді. Ел тұрғындары негізінен сиыр етін таңдады – 6 кг (+7,1%). Одан кейін шұжық – 1,6 кг, жылқы еті – 1,4 кг (+7,7%), қой еті – 1,4 кг, тауық еті – 1,2 кг және шошқа еті – 862 г.

Ең көп ет пен ет өнімдерін Атырау – 23,4 кг, Маңғыстау – 22,4 кг және Жетісу облыстарында – 22,1 кг тұтынған.

Бұл ретте Шымкент тұрғындары үш айда орта есеппен 14,1 кг, Қызылорда – 15,1 кг, Түркістан облысында – 15,2 кг ет өнімдерін сатып алды.

ТОҚСАН САЙЫН БІР АДАМ 11 КГ КАРТОП ТҰТЫНАДЫ

Көкөністерге келетін болсақ, қазақстандықтар картопты көп тұтынады. Тоқсан сайын бір адамға осы өнімнің 11 кг (-1%) келді.

Пиязды тұтыну 2,1% (4,7 кг), сәбіз – 7,1% (3 кг) өсті. Бірақ қазақстандықтар қияр мен қызанақты аз жей бастады – тиісінше 2,6 кг (-3,7%) және 2,4 кг (-4%).

Ел тұрғындары жемістерді көбірек тұтына бастады – 4%-ға (тоқсанына орташа есеппен 15,6 кг). Бұл негізінен алма – 4,4 кг (+7,3%) және банан – 1,4 кг (+7,7%). Қазақстандықтар сондай-ақ, құлпынай – 521 г (+25%) және тәтті шиені – 464 г (+33,3%) көбірек жеді.

Жемісті ең көп Маңғыстау облысында жейді – бір тұрғынға 21,4 кг, Астанада – 18,8 кг және Алматыда – 17,9 кг.

Орташа қазақстандықтың рационына 3,6 л шикі сүт (-16,3%), 3,1 л айран (-3,1%), 596 г ірімшік (+20%), 50,7 жұмыртқа (+3,6%), 3,5 л күнбағыс майы кірді.

Тәттіқұмарлар 4,4 кг қант (+7,3%), 622 г шоколадтты кәмпит, 219 г шоколад және 538 г балмұздақ жеді. 

НАН, МАКАРОН МЕН КҮРІШТІ ТҰТЫНУ ТӨМЕНДЕГЕН

Қазақстанның бір тұрғыны орташа есеппен 31,1 кг нан-тоқаш және жарма өнімдерін жеді, бұл өткен жылдың сәйкес кезеңімен салыстырғанда 2%-ға аз, деп жазады LS. 

Күрішті тұтыну 5%-ға, тоқсанына 3,8 кг-ға дейін, макарон мен рожкиды тұтыну 3,7%-ға, 2,6 кг-ға дейін, бидай наны 2,7%-ға, 7,2 кг-ға дейін төмендеді.

Бұл ретте қазақстандықтар қарақұмықты өткен жылмен салыстырғанда (1,6 кг) 6,6%- ға, бидай ұнын –1,8 есе (8,4 кг) тұтына бастады.

Нан-тоқаш және жарма өнімдерін ең көп тұтынатын Түркістан облысының тұрғындары – 43,9 кг, Жетісу – 35 кг, БҚО – 33,9 кг, ал астаналықтар – 24,8 кг, алматылықтар – 25,3 кг және Маңғыстау облысының тұрғындары – 25,9 кг.

ҚАЗАҚСТАНДЫҚТАР ҚАЙ ӨНІМДЕРГЕ АҚШАНЫ КӨБІРЕК ЖҰМСАЙДЫ

2024 жылдың бірінші тоқсанында қазақстандықтар орта есеппен азық-түлік пен алкогольсіз сусындарға 131,3 мың теңге жұмсады, бұл өткен жылмен салыстырғанда 6,7% - ға артық: 2023 жылдың бірінші тоқсанында тамақ пен сусындарға жұмсалған шығындар бір адамға орта есеппен 123,1 мың теңгені құрады. Содан кейін жылдық өсім 21,1% - ға жетті.

Finprom мәліметінше, 2024 жылдың бірінші тоқсанының қорытындысы бойынша тауарлар мен қызметтердің бағасы бір жылда 9,3% – ға, азық – түлік тауарларына-7,5% - ға, ал тікелей азық-түлік пен алкогольсіз сусындарға-7,2% - ға өсті.

Қазақстандықтардың азық-түлік пен алкогольсіз сусындарға жұмсаған барлық шығындарының үштен бірі ет пен ет өнімдеріне жұмсалды: жан басына шаққанда 43,3 мың теңге, бұл өткен жылмен салыстырғанда 6,4% - ға артық.

Сондай-ақ, ел тұрғындары нан өнімдері мен жарма өнімдеріне және сүт өнімдеріне елеулі қаражат жұмсайды.