2025 жылғы негізгі Ұлттық бірыңғай тестілеу барысында 711 талапкер ереже бұзған, деп хабарлайды Juzmedia.
Ғылым және жоғары білім министрлігінің мәліметінше, кейбір түлектер тестілеуге тыйым салынған құрылғыларды — смартфон, смарт-сағат, микроқұлаққап және шпаргалка алып өтпек болған. Осы себеппен 326 адам тестілеуден мүлде өте алмаған. Тағы 380 талапкер тест кезінде аудиториядан шығарылып, олардың нәтижелері жойылды. Қосымша бейнежазбаларды тексеру кезінде 5 адамның нәтижесі күшін жойды.
Бейнежазбалар 31 қазанға дейін тексеріледі. Министрлік мұны барлық талапкер үшін әділдік пен объективтілікті қамтамасыз ету үшін қажет деп түсіндіреді.
