2024 жылы республикалық бюджеттің кірісі де, шығысы да толық орындалмады. Бұл туралы Қаржы министрі Марат Такиев Парламентте баяндады деп хабарлады Juzmedia.kz.
Бюджет кірісі жоспардың 97,2%-ын ғана құрап, 19,6 трлн теңге түсті. Бұған импорт көлемінің азаюы, Теңіз кен орнындағы жобаның кешігуі және қосылған құн салығының бұрын-соңды болмаған көлемде қайтарылуы себеп болды. Мәселен, бюджеттен 1,2 трлн теңге көлемінде ҚҚС қайтарылған – бұл өткен жылмен салыстырғанда үш есе көп.
Бюджет шығысы да 100%-ға жетпеді – 23,6 трлн теңге немесе 97,8%. Министрдің айтуынша, әлеуметтік сала мен инфрақұрылымға қаражат бөлінгенімен, кей индикаторлар толық орындалмаған.
Сонымен қатар, Қаржы министрлігі бюджет қаржысын тиімсіз пайдалану 24%-ға азайғанын, бірақ бәрібір 372 млрд теңгеге жуық қаржы тиімді жұмсалмағанын мойындады. Осы себепті 73 лауазымды тұлға тәртіптік жауапкершілікке тартылған, оның 67-сі – басшылық қызметтегі адамдар.
Министр бұдан былай бюджетті түзету және оңтайландыру процесі бойынша Парламентке нақты есеп берілетінін айтты.
